Mulonyo kato nan dikatokan, asanyo carito nan kadisabuik, adolah satu wakatu – katiko ombak nan badabua mahantam tapian pantai Padang nantun, tasabuiklah kaba elok dari Bundo Rubiah nan sadang kagadangan hati manarimo surek dari anak padusinyo, nan alah tingga di rantau urang. Anak padusi nyo tu – manulihan surek ka Mandenyo sarupo iko :

“ Wahai Bundo, kiniko denai iyolah sadang mangayuah biduak rumah tanggo sarato rutinitas hiduik, nan harus denai karajoan sasudah kami babulan madu. Disaat ikolah denai taragak jo Bundo. Apolai, Bundo tingga dake’ denai, tantu Bundo dapek pulo mancaliek kaadaan keluarga denai jo laki denai sarato pangalaman iduik nan denai lalui basamo Uda Sutan.

“ Ondeh..sungguah Bundo. laki denai – Uda Sutan ko, laki-laki nan elok bana. Dari caronyo, baa inyo manyayuh biduak nantun, Uda Sutan ko, iyolah sabana-bana laki-laki nan patuik denai cintoi. Baitu pulolah harok denai ka Uda Sutan nanko – indak kadipupuih pulo cintonyo ka denai. Denai mangarajoan sadonyo nan disukoi Uda Sutan, supayo dapek mambuek hati Uda Sutan tuh sanang. Picayo lah Bundo, denai mangarajoan kasadonyo sasuai jo nasihat sarato pasan-pasan Bundo kapado denai.

Takana bana dek denai, satiok kato jo baso, nan Bundo kece’an sarato Bundo bisia’an ditalingo denai wakatu dulunyo. Katiko tu, Bundo memaluak denai didado Bundo sarato mambelai rambuik denai di hari nikah denai nan awak salanggaroan jo alek nan gadang. Takana bana.. dek denai pituah Bundo nan sarupo iko : Nan ado, samo dimakan, Nan indak, samo dicari, Kok jauah, kana mangana. Kok dakek, jalang manjalang

Bundo, “ denai lai bajalan jo mancaliek iduik ko.., dari baa caro, Bundo mamandang.”!. Bundo iyolah contoh nan patuik denai tiru. Akhirnyo, denai bacito-cito pulo nak manjalani apo nan Bundo acok karajoaan ka Ayahanda sarato kami, anak-anak Bundo. Bundo alah ma agieh sadonyo cinto jo hati nan tulus sarato kasieh sayang sapanuahnyo hati ka kami sadonyo. Bundo ma ajaan ka kami, kiek iduik. Ba a nan sabana manjalani iduik ko. Sasuai jo pituah-pituah nan asanyo dari urang-urang tuo di kampung kito. Bundo alah mananam banieh-banieh cinto dihati kami. Wakatu itu, Bundo bakato ka kami – anak-anak Bundo : ”Jikok kato bamulo dari hati, Yo ka hati juo ka masuaknyo. Jikok kato bamulo dari lidah, yo talingo sajo parantiannyo”.

Baitulah Bundo ma aja kami, supayo kami manyimak yo sabana simak, mandanga yo sabana danga, satiok kato, nasihat, pituah nan diagieh dek rang tuo-tuo.

“ Bundo….., Katiko ananda menulihan surek nangko ka Bundo, takajuik denai dek kehadiran Uda Sutan – disampiang denai. Katiko tu pulo, Uda Sutan, ikuik membaco isi surek denai ko ka Bundo. Uda andak pulo mangatahui, apo nan ka denai tulih ka Bundo dikampuang. Ternyato Bundo…, Uda Sutan, bakaciinan bana marasoan detik-detik indah nan ananda lalui basamo Bundo. Baa bana kasieh sayang Bundo ka kami. Baa bana, cinto Bundo ka Ayahanda kami, sarato baa bana hati nurani Bundo marasuak kadalam jiwa dan pikiran denai dalam iduik bakaluarga baeko. Wakatu tu, nasihat Bundo nan tangiang ngiang ditalingo denai adolah : “ nan kuriak iyolah kundi, nan merah iyolah sago, nan baiak iyolah budi nan indah iyolah baso ”. Ba itu bana, Bundo basaru, dalam ma aja denai dalam ba baso basi, bia nak elok iduik denai dirantau.

Sasudah mambaco surek karinduan hati ka Bundo ko, Uda Sutan mamintak denai supayo mewarisi sipat-sipat Bundo, nan kasiehnyo indak ta ukua panjangnyo.

Bundo …, bahagia hati denai rasonyo, karano Uda Sutan alah pulo bakatatapan hati ka denai, untuak macintoi denai surang. Uda bajanji ka denai ; Inyo nak manjadi selimuik angek denai. Inyo nak manjadi konco karik denai untuk tampek kabacarito. Inyo nak manjadi panghulu denai kutiko denai paralu bimbingannyo. Inyo salamonyo nak basikawan jo denai kutiko denai mangasuah anak-anak denai, yaitu cucu cucu Bundo.!.

Denaipun alah bajanji ka Uda Sutan wahai Bundo …, Uda Sutan nak denai jadian kapalo rumah tanggo – tampek denai balinduang jo anak anak denai. Uda Sutan nak denai jadian kasieh nan abadi – tampek denai bakasiah sayang. Alah denai dangaan apo kecek Bundo dahulunyo. Asa lai angok angok. Asa lai jiwo jiwo patuang. Namun nan bana disabuik juo.

Denai baharok doa dari Bundo…supayo Allah SWT, melindungi kami dari godaan dunia iko. Amin Ya.. rabbal alamin. Sambah sujuik sarato Paluak jo cium denai ka Bundo, Ayahanda sarato salam sayang denai untuak sanak sudaro denai.

Sampai jumpa ananda dari rantau….

Serie : baminang minang jo bahaso minang.